| Ламо мельть превезэн валовсть // сборник Монь вайгелем; автор: Илька Морыця; 1935. | Мордовская библиотека |
| Книга: Илья Кривошеев. Монь вайгелем: Морот 1924—1934. — Саранск: МордГИЗ, 1935. — с. 35—36 | |
| << Цветяк << | >> Монь ким >> |
|
Сырнень цецяв сёксень садось, — Килей лопат рипаить; Тундонь тветэсь козонь кадовсь, — Мезень мельсэ монь саить? Ютан Пушкин сад кияванть, Кува тундонь чись эльнесь; Ютан мазый твет пиреванть, Кува мором монь кельнесь. Ламо мель превезэн валовсь, Буто тантей инзей сок; Мекс истя те монень савовсь? — Пушкин марто кортан прок. Садонть велькссэ увны вармась Килей прятнень нурявты, Мода лангонь мештенть чамась Викшнень киякс неявты. Рипить велькссэнь сырнень тветнэ, Нурьсезь-нурьсезь прязон кольгсть, — Буто кортыть лопинетне; „Минек чамас пургась сёксь”. Мон кель-валом гурьви толокс Моронь чадова туевсь, — Пушкин ладсо моронть морамс, Сонзэ вайгелесь муемс. Пушкингак тия ютакшнось, Зярдо бути тесэ ульсь, — Сёксень читне кода сакшность, Кода садганть думазь мольсь. Сырнень тветсэ сёксень садось, — Пушкин следганть Илька мольсь... Тундонь тветэсь козонь кадовсь? — Сия черьнеть прязон промсть... Черь сиянть лангс апак ванно, Мольть, мелем тон, од кива, — Кеместэ виемсынь санон, Од эрямонть течива. Косо ульнесь эрзянь цёра, Косо пенькат сон карыль, — Тозонь чачовсь одонь пора, Тосо радио моры. |
| << Цветяк << | >> Монь ким >> |
| Сборник Монь вайгелем; автор: Илька Морыця; 1935. | |