| Авакай // сборник Монь вайгелем; автор: Илька Морыця; 1925. | Мордовская библиотека |
| Книга: Илья Кривошеев. Монь вайгелем: Морот 1924—1934. — Саранск: МордГИЗ, 1935. — с. 10—11 | |
| << Ленин << | >> Тундо >> |
|
Кодамо седейнет, Авай корьмакай?.. Мезеяк а теят, Коли сась се ормась, — Коданя кирьдевсь теть Монь тетянь куломась? Коданя кельгстявсть тонь Седейне потмозот, Коданя кандовсь сон Сэрь канды рунгосот Покш вайгель се лужась, Мирьдеть сай ружиясь? Аварьдезь сельминеть Туманнэс вайневить, Сияка сельведьнеть Чамават чудьневить. Кода, ух, тринякай, Монь авинем, эрят? Кудосонть аштемнеть, Вай, эрямнеть пелят. Аштят тон кудосонть Калавтонь седейсэ, Лецьнесак эрь-ялгат Аварьдень мельнесэ. Якамстот кудованть Сельведьсэть симеват, Ваномстот вальмаванть — Тетянь прок учомат. Седейсэнь, мельнесэнь Аштят тон, авакай; Эрьва чинь думнесэнь Кирдтян тонь, корьмакай... Монгак, ведь, содаса — Монгак, ведь, маряса, Кодамо се ёжось — А шкасто явомась: Тетясто-авасто, Вечкима поласто... Мезеяк а теят, Коли сон а шкасто, Куломась, саизе, — Коли сон а парот, А берянть а кочки, — Калмазырьс виизе. Вечкема авинем, Нардыть тон сельведьнеть... Седейсэть ризкс палынть Марясызь эйднинеть. Лембине марямсон, Авакай, лецьнетян; Толкс палы седейсэнь Морыне теть тештян. Мельнестэнь а тукшнат, Авакай-тринемай, — Алтасынь морон теть, Авинем вечкемай. |
| Маяк—Саратов, 1925. |
| << Ленин << | >> Тундо >> |
| Сборник Монь вайгелем; автор: Илька Морыця; 1935. | |