Якстере паця, автор: Долгов П. // сборник Васень сятк, 1929. Мордовская библиотека
Книга: Васень сятк. Эрзянь морот ды ёвтнимат. Пурнынзе А. Дуняшин. — СССР-энь Наротнэнь Центрань Издательствась, Москов, 1929. — с. 40—45

<< Колмо киява << >> Од койсэ >>

ЯКСТЕРЕ ПАЦЯ

Кекшсь лов алов велесь. Малаванзо ютыцясь а несыяк. Кудотне, прок лов пандынеть, лиссть моданть алдо.

Аламот кадовсть читнеде роштуванть самс. Эряви анокстамс.

Аноксты велесь. Эсь койсэнзэ. Лия ульця — лия кой. Лия семия — таго лия кой. Таштось одонть марто бороцить.

Захар-атянь семиязо аволь покш: сонсь нинзэ марто, цёразо Яша, урьвазо Палаша ды кавто вишка эйкакшкеть — нуцьканзо.

Сонсь Захар эщо ланкс ваномс аволь пек сыре. Чамазо якстере. Сакалтнэ од койме лацо ланга каязь, грудентень новольсть.

Ушосто совась Захар. Кувать ловонть ланкс ваномадо мейле сельмензэ цивтердыть, аламодо летькезевсть.

Ансяк пильгензэ чалгинзе порогонть трокс, Вася нуцькинесь кедьнензэ каршозонзо венстинзе.

— Покштяй, саимак кедезэть, саимак...

— Ох-ох, цёрынем. Сизинь аламодо... аштек ужо...

Захар-низэ яла ваны вальмаванть.

— Мейсь пек течи ламо ульцяванть якицятне?.. Тон, атя, а содат, месть истя учильнянть вакссо лажныть?

— Пандя теть... Пурнак ярсамс. Сокомолецнэ, несак роштува анокстыть. Вансак вана, роштувань каршо попнэ кармить служамо. Сыньгак тосо эсь койсэст.

— Ай, вай, вана койтне тусть. Минекнеяк паряк молить тозонь якстере пацяст марто?

— Кода эно.

Яша, Захаронь цёразо, ошсо роботась кавто колмо ие. Тосто козейкантькак туизе. Мазый, бойка Яша-низэ. Раужо сельмензэ ёндолсо вергелить. Якстере пацясь прясонзо толкс палы. Ванат Яша-нинзэ ланкс — седееть чавозь чавозеви.

— Юты ульцява Палаша — чись манейгады, — мерить Яша-ниде велесэнть.

Эщо ошсо Яша совась партияс. Сондензэ икеле партиясо ды комсомолсо ульнесь Палаша.

Ней сынст кавто эйкакшост.

Ошсто самодо мейле Яша кортась аванстэнь:

— Авай, тон иля мурне. Мон тосо ошсонть смычка теинь. Урьвакстынь, робочеень тейтерь саинь.

Захар-низэ ансяк прянзо чаравтызе, пшкаць:

— Паз мартонк улезэ... Монень паро.

— Пастомояк, авай, эрятанок кодаяк.

— Ванодо сяткинем...

А чаркоди Захар-низэ: кода истя од ломатне эрить — церькував а якить, пазнэнь а озныть. Столь экшстэ стить — а чекить-покить.

Нейгак вана. Вандыде мейле роштува. Эряволь ташто коенть лацо пуре заводямс, пива пидемс. Чапамодонть аламошка саемс. Тынь илядо пельть, гостекс ломатне а сыть.

Эзь лисе атятнень лацо. А вечкить од ломатне симима.

— Тон, авай, ванок эйкакшнэнь мельга. Минь Палаша марто клубов мольдяно. Анокстамс эряви.

Тусть.

Валське совсесь шабранть урьвазо. Ёвтнесь:

— Клубсонть месть тейнить. Ой-ой... Весе якстере пацясот. Весе кинига экшсэть. Палаша яла тонавты аватнень эйсэ. Яша цёратненень толкуви. Маринь роштувадонть месть кортыть. Арасель, мерить, мезеньгак роштува, попнэ ансяк маньшить.

— Вечксызь тынк Палашанть аватне. Ошсто улко сакшность, сыньгак шнасть эйсэнзэ. Те, мери, золота, аволь ава.

Роштувань каршо.

Менельстэнть чоп мольсь лов. Сиянь понынетне яла прыть верьде, яла прыть. Конилькава ловось.

Чокшнэ ёнов лоткась прамодо. Кардаснэнь кенерсть теньсимаст. Ортатнень икельде ловонть усксизь ве ёнов.

Маць велесэ таштокс эрямось. Маць...

Захар-атя куйсь пецька ланкс. Цюлканзо каинзе костямо. Кунсолы. Пецька турбасонть вармась цийни. Чить весе велень шумось эйсэнзэ маряви. Ней чокшнэ. Косояк — а куш, а каш. Косо бути ве ёно ансяк эйкакш аварьдевсь. Сырьгойсть аламос Яшань эйкакшнэяк. Одов матидевсть.

Яша арась кудосо. Арась Палашаяк. Клубсот сынь.

Гайнезь гайни клубось. Комсомолецнэ морот морыть. Уголсо пионерт пурнавсть, якстере пацинеть киргасост. Налксить.

Покш икельсь кудосо (клубонь горницясо) якстере пацянь флакнэ од жердя вельде стявтозь уголга. Скамиятне пешксеть ломаньде. Озамс акозонь. Улить стядояк аштицят.

Тесэ пелезэ велесь. Ловомсдеряй — пеледензэ ламо.

Столенть экшсэ вечкима докторось корты.

— Весе тынь, ялгат, аволь вишкинетядо. Содасынк, кода ломань шачи, кода сон касы, кода эри. Мезеньгак светой дух арась. Знярдояк ды кодамояк паз святой духто эзь шачне. Ломань шачи ансяк ломаньстэ: цёрасто ды авасто. Эряви седе ламо ловномс, кода ломань шачи. Улить истят кинигат. Тонавтозь ломань знярдояк а кеми роштувас.

... Карво ливти — маряви. Кувать кортась ломанень шачомадо врачось. Кунсолость парсте велень ломатне роштувань вестэнть.

Пелевесь ютась. Церькувань сторожось омбоце боканзо ланкс велявтомсто сырьгойсь.

— Мезе истя онстон неинь?.. Мезе?.. А-а... Те аволь онстон. Монсь ульнинь клубсо. Захаронь урьвазо. Палашка... Якстере пацясо... А мери баягасо звонямо. Мери меньгак роштува арасель. Меньгак. Да-а... Дохтуроськак корты... Паро Палаша. Паро врачоськак, сынст эряви кемемс...

— Ну, остаткадо вачкодемс. Сы иестэ а карман.

Кельме кшнинь кельсэ чавсь баяганть эйсэ сторожось. Баягань вайгелесь куватьс токшевсь вальма сленикатнева.

Кона-кона кардайстэнть лиссть авинеть-бабинеть.

Чикордыть ортатне. Чикордыть атятне. Чикорсо моли ташто коесь, церькувасонть колмо-ниле атине, кавто-колмо сыре бабине. Седе отнэ удыть. Онстост несызь Палашань якстере пацянзо.

Удыть од ломатне, удомаст пачк кортыть:

— Эзь шачо паз... шачсь революция... шачсь социализма.

Чамаст удыцятнень пеедить.

<< Колмо киява << >> Од койсэ >>
«Якстере паця», автор: Долгов П. // сборник Васень сятк. Эрзянь морот ды ёвтнимат. — 1929.

Последнее обновление страницы: 2017.12.03
На главную