| Чикаго ош // сборник Пурьгинень зэрть; автор: Артур Моро; 1930, 4 апреля. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 45—49 | |
| << Од коев << | >> Сёрма деданень >> |
|
Аволь умок Ульнесь се шкась, Кода актриса Клубсо робочейнень Кедень веньстезь Пазонь авакс морась, Сон морась, Прок цеця поцо лейнень: „Чикаго ош, — Покш кудонь ош! Алксозо ваясь Покш иневец! Чарькодика, Вечкимам Ёш, Сон тусь... Сон тусь монь сец. Чикаго ош — Верьксезэ менельс токась! Чикаго ош — Весэ ошнэде ош! Минек паронок — Яга сокась, Тосо гигант, — Арьсика, Ёш! Техникась тосо Чудат теи, Чинть полавтызь Умок тосо, Тесэ сельмет Истят а неи. Аздан, мик, Ёш. Эрян косо? Чикаго ош! Ош Чикаго! Культурань центрась Тонь эйсэт! Чикаго ош! Ош Чикаго! Масторонь виесь Седейсэт!” Робочейтне Не валтнэнь кис Актрисанть ланкс Варштасть поласт: — Содасынек, Кодамо чис Тосо эрить „Сырьнень паст”! Содасынек, Зняро виест, Содасынек, Кода касыть. — Ломань верьсэ Чудить леест, Ломань ланксо Сынь кинь сасыть. — Содасынек Сынст покшт кудост. Содасынек, Сынь пек сюпавт. Потавсынек Букань судост! Эсист эйстэ Тейдяно лавт! Аволь умок Ульнесь се шкась, Аволь умок — Морось гайнесь, Кавтошка иеть, Нать, ютасть — Московоськак Лия ульнесь. Молян састо Ошонть чирева: Ваннан перька, Ваннан верев. Тесэ ульсь ки Таргазь пирева, Гуекс меньшезь, Леенть пелев. Тезэнь ёртнесть Ошстонть дрямонть Ламо царень Прават ды пинк. Ванока ней! — Од эрямонть Тесэ сроить Грох! Зэрь! Гай! Тинк! Ваннан паксяв — Пакся а неян! Вешнян пиреть — Пиреть арасть! Хоть пижакат: „Мон мезе теян?! Чикаго ош Тезэнь сроясть!” Варштак менельс — Менелесь ёмась, Варштак масторс — Асфальт ацазь! Чикаго ош! Прок баба комась, Ломань сецтэ Симезь, ярсазь. Чикаго ош Тандаць тень эйстэ — Навоз куцясто Ош касы. Тесэ виесь Чуди прок лейстэ, Советской ош „Чиконь” сасы! Советской ош, — Робочейть сроизь! Советской ош — Мельсэ теезь! Весе паксянть Тракторсо роизь, — Ней а сави Сокась неемс! Иля лырнэ Актриса-„патя”! — Од ошонть ланкс Тетькить сельметь! Чикагонок кайсь Апак хватя! Чикагось кайсь, — Кавто иеть! |
| 4 апрель. 1930 ие. |
| << Од коев << | >> Сёрма деданень >> |
| Сборник Пурьгинень зэрть; автор: Артур Моро; 1931. | |