| Тумо ало // сборник Пурьгинень зэрть; автор: Артур Моро; 1926. | Мордовская библиотека |
| Книга: Артур Моро. Пурьгинень зэрть. — Центриздат, Москов, 1931. — с. 6—7 | |
| << Чесноков Федянень << | >> Пекшень дуткине >> |
|
Пиже тумо ало Паро аштимась. Пиже луга ланксо Паро думамось. Кода соловей Вешкезь морави, Кода чуди лей Чиденть красяви. — Тейтеренть марто Паро кортамось, Киняленть ёнов Паро ванумась. Чись пек валдосто Миненек светясь, Раужо лёмнэсь Ашосто цветясь. Комсомолка марто Вейсэ аштинек, Берянесь зярдо Ютась, кортынек. Кода эринек, Кода аштинек, Мезе неинек, Ды мезе теинек. Кода кулакось Эйсэнек муцясь, Кода сюпавось Локшосо дуцясь. Кода вачодо Робутавтымизь, Кода кискадо Берянькс ловимизь. Берянесь ютась Ламоце годнэ, — Вот, эрямось сась! — Корты народнэ. Менелесь вельтявсь Зоря фатасо, Паксянок сокавсь Шуми тракторсо. Якстере чизэ Седеяк свети, Раужо лёмнэсь Мазыйстэ цвети. Лиякс моротнень Нармутне морыть. Лиякс эрямонть Ломатне теить. |
| 1926 ие. |
| << Чесноков Федянень << | >> Пекшень дуткине >> |
| Сборник Пурьгинень зэрть; автор: Артур Моро; 1931. | |